* تزوج وعيش سعيد سلسلة حلقات هتفطس من الضحك *

تزوج وعيش سعيدا

الأستاذ نوفل الحدق فتح مكتب للزواج وأطلق عليه أسم( تزوج وعيش سعيدا) ولكنه ليس مثل مكاتب الزواج الأخرى فهيهات.. فهو يتبع أسلوب عصرى حديث فى المعامله مع الزبائن الراغبين فى الزواج .............فقد نشر فى الصحف اليوميه والمحطات التليفزيونيه الفضائية منها والمحلية.. أعلان ملفت للنظر وغريب جعل مكتبه يعج بطالبى الزواج من الجنسين ولمختلف الأعمار فكان نص الأعلان كالأتى

تزوج وعش سعيدا

لك ياسيدى ولك ياسيدتى مفاجأة سارة من مؤسسة نوفل الحدق
أسلوب جديد للأرتباط بشريك العمر..الزواج بالتقسيط وشهادات الضمان
إذا كنت تعانى من ضائقة ماليه وغير قادر على مصاريف الزواج فمكتبنا قادر على حل هذه المشكلة فيقدم لكم القروض الميسرة طويلة الأجل من البنوك الوطنية
وإذا كانت الشقة تقف عقبه فى طريقك فعمارات العرسان بمشروعنا السكنى الجديد توفر لكم المكان المناسب
لدينا خبراء نفسيين وأجتماعيين ومركز طبى متكامل ومول به كافة متطلبات الزواج..فريق عمل متكامل لخدمتكم ( مأذون/ أطباء / صالة أفراح / زفة /كوافير ومركز تجميل..ألخ)
زيارة واحدة لنا وستقول وداعا للعزوبيه..وداعا للوحدة ..وداعا للألم
ترخيص رقم 666/2009 وزارة الشؤون الأجتماعيه /مؤسسة نوفل العالميه للزواج الحديث ت29999990 عشرة خطوط فاكس 27777770المركز الرئيسى القاهرة 8أ ..الدرب الأحمر بجوار المطافى
سارع وأشترك معنا ولا تنسى هدية زواجك من نوفل للأدوات الصحية

10 متر بلاط سيراميك فرز أول+ صبانه + سلاكة حوض
أحصل على أستمارة التقديم بمشروعنا العظيم مع تمنياتنا لكم بحياة زوجيه سعيده

(وخلقنا لكم من أنفسكم أزواجا لتسكنوا إليها )

صدق الله العظيم

انتظرا حلقات المسلسل المضحك

تزوج وعش سعيدا

منتديات الافضل

مصطفى جامع

Exclusive

نتابع مع بعض اولى حلقات المسلسل الكوميدى
" تزوج وعش سعيدا "

الحلقة الأولى

شيرين وهانم
الآنسة شيرين فاتها قطار الزواج منذ زمن بالرغم أنها على قدرمعقول من الجمال والرشاقة والأناقة حاصلة على مؤهل جامعى وتعمل فى وزارة الصحة لها زميله فى نفس القسم فاتها أيضا نفس القطار أسمها هانم ولكنها كانت ترفض العرسان المتقدمين لها بأحساسها بأن العريس المناسب لم يظهر حتى الأن (هانم بقى وبتتشرط !!) وتمر عليها السنوات سريعا وهى ترفض العرسان فهذا تخين وذاك رفيع وآخر بيئه وده أبن أمه وغيرهم كثير حتى كبرت فى السن ولم يعد يتقدم إليها أحد وأشتهرت بأسم هانم رفضاهم وبالرغم من تقديمها الكثيرمن التنازلات والأشتراطات بعد ذلك ولكن النصيب لم يصيب ومكثت تتحسر على شبابها الذى يهرب من بين أصابعها وسنين عمرها التى قضتها فى الرفض والنفور والعنطزه
هيه ..الله يرحم أيام زمان كان قطار الزواج قشاش وسائقه يأخذ تعسيله فى جميع المحطات وأللى كان بيشاور له بيقف له ..فكان بيلم الحلوة والوحشه والتخينه والرفيعة والمجنونه والهبله مابيخليش ..دنيا غدارة مابتخليش أللى راكب راكب ولا أللى ماشى ماشى حتى ظهرت القطارات الحديثة والمكيفه واللى معاه يركب واللى معهوش مايلزموش ..وتكدس الركاب الغلابه على الأرصفة وهم يتحسرون على زمن القشاش الذى ولى وفات
وتوطدت الصداقه بين رفضاهم وزميلتها وشيرين وأصبحا يشكلان ثنائى متميز فى الوزارة ومثل أعلى للصبر وطولة البال
( وبعد أن فطرت شيرين ورفضاهم سندوتشات الفول أبو زيت حاروفحل البصل وحبسوا بالشاى المغلى من البوفيه جلسا سويا يتحدثان فى أمور الدنيا والعيشه المقندله وجنون الأسعار والحياة الكئيبه وآخر الأوشعات قبل أن ينصرفا إلى مكاتبهم لتبدأ عملهم الروتينى اليومى )
رفضاهم : قرأتى الأعلان بتاع مؤسسة نوفل للزواج
شيرين : عمرك أطول من عمرى كنت حقولك عليه..ألا يكون نصاب يابت وبيضحك على الناس قال أيه الجواز بالتقسيط وبالضمان تقوليش ثلاجه هئ هئ > قالوا ضربوا الأعور على عينه قال أيه خربانه خربانه ..ماتيجى يابت نروح نشوف أيه الحكايه أنشا لله نطلع بالعشرة متر سيراميك
> سيراميك أيه يا هبله ده بكتيره ناخد السلاكه هئ هئ هئ ..أنا سمعت من واحده صاحبتى أن الأستمارة بـ50 جنيه وصورتين
> وماله يمكن تضرب يابت معانا ونلاقى أبن الحلال أللى مش عايز ييجى ده
> أأقولك تعالى نتقابل آخر النهار ونروح المكتب وأحنا وحظنا
> ماشى يا حبيبتى لما أقوم بقى أشوف العالم المقرفه أللى بايتين قدام المكتب باى يا شيرى ماتنسيش.. آمييه... ألبسى الطقم الأحمر وأعملى شعرك عند الكوافير عايزين نروح على سنجة عشرة الناس بتاخد بالمظاهر
> وأنتى ماتنسيش تلبسى حتتين الصيغة والمصحف الدهب بتاع الست دى أمى
هئ هئ هئ خخخخخخخ ..كفك ..قشطه

*************
dihk

وانتظروا باقى حلقات المسلسل
" تزوج وغش سعيدا "

منتديات الافضل
مصطفى جامع

Exclusive

ههههههه حكايات جميلة بس ياتري حقيقية ؟؟؟؟؟؟؟؟

حكايات جميله جدا
بس كمل عشان التثبيت

هههههههههههههههههه نايس موضوع يا ابو جامع هايل ويلا كمل فعلا عشان التثبيت

محسن شاهين كتب:: ههههههه حكايات جميلة بس ياتري حقيقية ؟؟؟؟؟؟؟؟

مشكور على الرد يا محسون .. بس انت تعتقد انها حقيقية !!!

ميدو مشاكل كتب:: حكايات جميله جدا
بس كمل عشان التثبيت

مشكور على الرد وان شاء الله هكملها ....

zaftour كتب:: هههههههههههههههههه نايس موضوع يا ابو جامع هايل ويلا كمل فعلا عشان التثبيت

مشكووور جدا يا زافتور على الرد الجميل دة !!!

أها ممكن

الحلقة رقم ( 2 )

وفى المساء تلتقى شيرين مع رفضاهم وتركبا المكيروباس المتجه إلى الدرب الأحمر للتقديم فى مؤسسة نوفل للزواج الحديث
رفضاهم : عينى بارده عليكى يا شيرين يا ختى بالطقم الأحمر أللى ملعلط ده يعنى كان العرسان أنطسوا فى نظرهم مش شايفين الحلاوة دى ولا الجسم الملفوف والشعر الأصفر الحرير أللى على الخدود يهفهف ويرجع يطير يتيييررر
شيرين : أنا حاجى جنبك حاجه يا رفضاهم ياختى ده كفايه كيلو الدهب أللى أنت لبساه يزغلل عينين أجدعها راجل ولا الحسنه الجميله أللى على خدك دى هى طلعتلك أمتى يابت
> آمييه يا أوخه ..دى عيره عملتهالى البت سونه بنت أختى بقلم الحواجب ..والدهب أللى شايفاه ده تلات تربعه قشره وشرفك.. آدينا بنعمل أللى علينا والباقى على ربنا... هييه دنيا مفيش حظ يا روحى
> ليكى حق يا حبيبتى مفيش حظ ..عارفه البت حفيظه أللى لسه متعينه جديد
عندنا أتخطبت أول أمبارح وحتتجوز الشهر الجاى الواد هشام المعفن
> عارفاها البت المصديه المقلحفه دى تتجوز ..عجبت لك يازمن ..العفشين ليهم حظ والقمرات أللى زينا يروحوا مكتب نوفل للتنسيق هئ هئ هئ
> تتك أيه يارفضاهم آل مكتب تنسيق آل ..تفتكرى يابت كلام الأعلانات ده بجد
ولا بيشتغلونا وتطلع نصبايه كبيره ..حاكم النصب ماشى فى البلد اليومين دول زى الحلاوه
> أدينا قربنا نوصل ويا خبر بفلوس بكره يبقى ببلاش أحنا خسرانين حاجه غيرشى الخمسين لحلوح يالله آدينا بنتسلى
( تصل شيرين ورفضاهم لمؤسسة نوفل فتجدا طوابير طويله أمام الباب ويجلس موظف على مكتب أمام باب العرسان وموظفة أمام باب العرايس لتوزيع الأستمارات وتحصيل ثمنها قبل الدخول إلى المؤسسه وفى صف الرجال يقف كل من طلعت الصدمان وشريف ملقاط ليحصلا على أستمارات الزواج وهم يلبسان البدل والكرفتات آخر أنتكه )
طلعت : شايف ياواد ياشريف الموزتين أللى واقفين فى صف الحريم أللى هناك
شريف: أنهى فيهم يا صدمان أنا مش شايف موزز كلهم سكه عايزين يتولع فيهم
> ياض الحتة أللى لابسة فستان أحمر وشنطه وجزمه حمراء وكلها أحمر فى أحمر وعامله فيها سندريلا وصاحبتها أللى معاها أللى لابسة باترينة دهب فى أديها وصدرها وعمالين بيبصوا نا حيتنا
> يادين النبى دول باين عليهم عدى القطر فوقيهم من 30 سنه.. بس متريشين ..بقولك أيه خد أنت الحته الحمراء الطريه وسيبلى الناشفه المأسده.. دى محل صاغة متنقل.. بركاتك يا سرجانى
> يخرب بيتك يا ملقاط مش حتسيبك من الداء المنيل ده عينك ماتجيبش ألا الدهب
> مش قادر يا صدمان يا خويا الدهب بيجننى
> أأقف ياض هنا الله يخرب بيتك رايح فين ماتودناش فى داهيه
> حاخد بصه من قريب وأملى عينى منه.. وأرجعلك على ماييجى علينا الدور
(يقترب شريف ملقاط من طابور الحريم ويقف أمام رفضاهم وهو فاتح فمه ويحسب فى عقله كمية الدهب وكم يساوى ثمنها ويصعد بنظره من أسفل إلى أعلى وهو فى حالة أندهاش فتتنبه رفضاهم لنظرات شريف المتفحصة بعد أن زغدتها شيرين فى ظهرها وهى تقول ( أميييه السنارة غمزت يا اوخه شوفى شغلك )
ترفع رفضاهم يدها وتهزها لتشخلل بالغاويش وتقوم بتعديل وضع السلاسل الذهبيه والسبيكه الدهب والمصحف والمشاءالله على صدرها ولسان حالها يقول أنا أهه فيزداد أقتراب شريف منها وهو يقول : أيه الجمال ده يامودام
رفضاهم : موزمازيله من فضلك
شريف : جولدى يا خواتى جولدى
> جولدى أنت بتشتغل فى شركة جولدى ياشاطر !!
شيرين : يمكن جولده بيوجعه هئ هئ هئ..أهرش بعيد يابنى مش ناقصين جرب
تتنبه موظفة الأستمارات للحديث بينهم فتهب واقفه وهى تشير بأصبعها ناحية صف الرجال : أتفضل هناك مع الرجاله يا جدع أنت.. هنا طابور الصبايا..(تتك نيله مستعجل على رزقك حتطلع فوق وحتقعد معاهم لما تزهق)
رفضاهم : شوفتى يا شيرين الدهب عامل شغل أزاى ..بس يارب يكون بفايده
(يعود شريف بظهره وهو لا يرفع نظره عن رفضاهم حتى يصل إلى صف الرجال)
طلعت : أأقف فى الصف يا ملقاط ما تفرجش علينا الناس
شريف : مش قادر يا صدمان يا خويا قدام عيار 18 و21 و24
> أهو طمعك ده أللى موديك فى داهيه ..أهدى ..أهدى حنقابلهم فوق وأبقى عبر عن مشاعرك براحتك
( تصل شيرين ورفضاهم أمام موظفة الأستمارات لشراء الأستمارة )
الموظفة : عايزه أستماره سوبر ولا عاده السوبر بـ80 والعاده بـ 50 جنيه
معصلجه : وأيه ياختى الفرق مابينهم
الموظفه : الأستماره السوبر تتعرض على العرسان لمدة شهروتنزل بيانتها بالصورة على النت والأستماره العاده تتعرض لمدة 15 يوم وبدون صوره وجميع المقابلات هنا تحت أشراف المتخصصين ..خلصونا سوبر ولا عاده
> هاتى أتنين سوبر ومشط كبريت ..هئ هئ هئ
> بتهرجى يا ختى ..خشى أنت وصحبتك من الباب ده أول أوضه على أيدك اليمين عند مدام سوكه (تتكم الهم )

يا رب الموضوع يكون عجبكم وانتظروا باقى الحلقات

ههههههههههههههههههههه

منتديات الافضل

مصطفى جامع

dihk

ههههههههههههههههههههههههههههههههه
جميل يا مصطفي بس في واحده اسمها رافضاهم

نسيت اقولك التثبيت بعد الحلقه الخامسه

نايس يا مصطي ولعها

ميدو مشاكل كتب:: ههههههههههههههههههههههههههههههههه
جميل يا مصطفي بس في واحده اسمها رافضاهم

هههههههههههههه
فى المسلسل دة هتلاقى كل الاسامى اللى ماتخطرش على بالك ...
شكرا على المرور الجميل يا مان !!!

ميدو مشاكل كتب:: نسيت اقولك التثبيت بعد الحلقه الخامسه

حرام عليك يا ميدو خمس حلقات كتير ... خليهم تلاتة كفاية وهبقى اكملها بعد الامتحانات ...

ههههههههههههه نايس

محسن شاهين كتب:: نايس يا مصطي ولعها

شكرا على الرد الجميل دة يا محسن !!!

الحلقة رقم (3)

التنسيق
المنظر : غرفه كبيرة مليئه بالسيدات والبنات وهن يقمن بملء بيانات الأستمارة وكأنها لجنة أمتحانات وتجلس مدام سوكه على مكتب وتراجع البيانات وترد على الأستفسارات وتدخل شيرين ورفضاهم وبيد كل منهن الأستمارة
سوكه: أتفضلوا أملئوا البيانات من سوكات وتعالوا نراجعها وأى أسئله أنا تحت أمركم
رفضاهم : ألا قوليلى ياختى هو أحنا حنقابل عرسان النهارده
سوكه: على حسب طلباتك فى مواصفات العريس لو موجود حتقابليه لو مش موجود حنتصل بيكى بالتليفون تيجى تشوفيه ولك حق تقابلى 7 عرسان فقط لو معجبوكيش تشترى أستماره تانيه بـ 50 حنيه ونجدد لك الأعلان
شيرين: أنا شايفه فيه خانة السن فى الأستماره نملاها ولا أيه رأيك
سوكه : الخانه دى أختيارى بالنسبه للستات أكتبى فيها السن أللى يناسبك أما فىخانة السن بتاعة العريس المطلوب لازم تكتبيها علشان نقدر نجيب لك العريس المناسب
( تأخذ الأستمارة من شيرين وتقف وهى ترفع صوتها للتنبيه على السيدات )
> خليكوا معايا ياعرايس أللى مش عايزه تكتب سنها هى حرة بس لازم تكتب سن العريس وأللى تخلص تيجى هنا علشان تراجع وتاخد لها رقم وتسحب أستمارة التقسيط أأقول تانى ..(تكرر التنبيه مرتين ) خدى صاحبتك وأقعدى أملى الأستمارة علشان قدامنا ربع ساعة وتبدأ المحاضرة
(تجلس شيرين ورفضاهم لتكتبا الأستمارات ويتناقشان فى كل بند قبل كتابته )
شيرين: أنا مش حكتب سنى خالص..أحسن نلاقى كل العرسان عواجيز ومكحكحين والعالم الواقعه أللى عايزين ممرضه مش عروسه ونصوم نصوم ونفطر على بصله من دار المسنين هئ هئ هئ
رفضاهم : تتك أيه ياشيرى ..يعنى عايزه عريس فرفور ومطقطق من شباب اليومين دول
> مش قوى كده ..بس يكون ماسك نفسه مش واحد رجله والقبر وأهى جوازه وأتحسبت علينا ونقضى بقية عمرنا بين المستشفيات وزيارة القرافه
> أنا حكتب العريس يكون مابين 35 – 45 سنه ..كويس
> كويس ..عندك أهى مواصفات العريس أكتبى يارفضاهم كل أللى نفسك فيه
> أنا كتبت أنه يكون رياضى وسمباتيك وشعره أصفر وعنيه زرقا ومن غير كرش وشيك وعنده عربيه وطوله 175سم وعنده شقة وعنده دخل لايقل عن 4000 جنيه فى الشهر ويقدس الحياة الزوجيه
> يخرب عقلك يارفضاهم ماتكتبى أحسن حسين فهمى أو أحمد عز بتاع السيما
منظرك كده حتبقى زبونه مستديمه فى مكتب نوفل حطيها تحت شويه يابت عشان نلاقى العرسان أللى يخلصونا من العنوسيه وأيامها الطين شوفى أنا كاتبه أيه
رجل متدين مرتاح ماديا لم يسبق له الجواز عنده شقه وشكله مقبول متوسط الطول ولا يدخن ومستعده للمشاركة فى الجهاز
> عايزه راجل متدين يا شيرين ..بكره يجولك كل أومات دقون وجلاليب من الأخوة ويتجوزوكى على 3 ستات وتكونى أنت الرابعه وتساعديه فى الجهاز !!
> وماله يا ختى أهو بس ييجى..تعال نسلم الأستمارات للوليه الحيزبونه علشان تراجعها ونخلص
(سوكه تراجع أستمارة شيرين بأهتمام وتنظر إليه بأستغراب )
شيرين أيه فيه حاجه
سوكه : أسمك شيرين المفترى ..أيوه أسمى شيرين المفترى فيها حاجه دى ..بس يامدام أسمك ده يطفش العرسان ..أنا رأيى نغيره ونحط أسم الجد ولما ربنا يسهلك أبقى غيريه فى السجل المدنى وأنتى حره
> تفتكرى
> نخليه شيرين زعيط.... أختارى أنتى أللى يريحك
> حتى أسم الجد منيل.. أأقولك خليه شيرين بس أحسن..على خيرة الله
سوكه: هاتى أستمارتك ياحلوة ..أيه ده ياست هانم... المواصفات أللى طلباها دى ما بتجيش مكاتب الجواز ..دوكهم سوقهم ماشى لوحده بره ..أكتبى كلام معقول عشان نعرف نوفقلك عريس يناسبك وأنت حره ما على الرسول ألا البلاغ
> طب شوفى أنتى يامدام سوكه أيه المناسب
> مودموزيل من فضلك.....
> أهلا.. بصره
> سيبك من العينين الزرقا والشعر الأصفر والفيلا والعربيه والوهم أللى أنت عايشه فيه ده ..نكتب راجل محترم يقدس الحياة الزوجيه من 40 – 50 سنه
ماشى يا عروسه
> ماشى يا أبلتى لما نشوف آخرة التنسيق بتاعكم ده
سوكه : أتفضلوا أستمارات التقسيط لما ربنا يوفق يا تستخدميها أو.. لا.. حسب حالة العريس الماديه
> طب والعشرة متر سيراميك والصبانه والشطافه
> شطافة أيه يا دلعادى ..سلاااكه ..مش لم تتجوزى الأول تبقى تفكرى فى الهديه
> مش باين لها لاشطافه ولا سلاكه ..كنت أتجوزتى أنت
> بتقولى حاجة ..على كولن أتفضلوا قى الصالة أللى جانبى علشان تحضروا محاضرة الدكتور فؤاد أبو عقدة وتقابلوا.. مستر نوفل

وانتظروا باقى الحلقات قريبا ان شاء الله

Exclusive

ههههههههههههههههههههه
يخرب عقلك جيبتها منين دي
بجد تسلم الايادي

شكرا على الرد يا ليندا ... ويا رب تكون عجبتك ...

لا بجد تفطس من الدحك فعلا

طب كويس انى عملت حاجة كويس فى المنتدى !!

اوك يا مان

هتثبتة بقى ولا اية !!
ههههههههههه

اوك

» حلقات سلسلة ميراث النبي لفضيلة الشيخ محمد حسان (25 حلقة) اجمل ما يمكن
» حلقات الشيخ محمد حسان بعنوان ::: جبريل يسال والنبى يجيب ::: حلقات اكثر من رائعه بصيغة Mp3
» مجموعه من الالعاب حمل وعيش وادعيلى
» لماذا تزوج النبى(ص) هذا العدد من النساء؟؟؟
» سلسلة احاديث المصطفي حول المسيح الدجال

*** تزوج وعيش سعيد سلسلة حلقات هتفطس من الضحك ***

* تزوج وعيش سعيد سلسلة حلقات هتفطس من الضحك *