كبر دماغك

موضوع من تدويني كتبته علشان نضع حد لكلمة كبر دماغك اللي هي كنايه عن الطناش !!


و اترككم مع المشهد الاتي


بداية المشهد : فلان قاعد مع علان في القهوه و بعديت تليفون علان رن وحدث الاتي :

فلان : ما ترد يابني علي التليفون
علان : لا
فلان: ليه يا عم بس ؟؟

علان : اهو بقي حلاقه و السلام

فلان: ليه بس الغلاسه دي ؟

؟

علان : بيني و بينك بحب اكبر دماغي

فلان: يا سلام ؟؟

علان : اه

فلان : يعني انت لما بتكبر دماغك الناس ما بتضايقش ؟؟
علان : يتضايقوا ليه ؟؟ دي حاجه عاديه و عمرها ما تضايق حد خالص مالص

فلان : طيب لو انا دلوقتي خلعت من القهوه من غير ما ادفع الحساب ؟؟ و كبرت دماغي يبقي ازاي الحال امال ؟؟

علان : ده انا اتنرفز نرفزه و احتمال دمي يفور فوران و اتضايق نفسيا كمان



يغشي علي فلان كالعاده في الحال





——————————



كبر دماغك ,كلمه بنسمعها كتير قوي الايام دي , كلمه بتحمل في طياتها جمود و استفزاز للمشاعر ,كم مره اسمعها و انا ماشي و تكون بين واحد و صحبه كام مره..كام و كام
الكلمه دي بقي بتعبر عن اللامبالاه يعني واحد يبقي بيعمل حاجه غلط و يجي حد ينصحه يرد بكل وقاحه و يقوله يا عم كبر لو كل واحد كبر دماغه يبقي مفيش حاجه تمشي خالص و بالعكس كل المشاكل هتكبر يبقي فعلا اللي سمي التطنيش كبر ده عنده حق لانه بيكبر في المشكله