لفظ صايع

موضوع: لفظ صايع الأحد أغسطس 17, 2008 4:18 pm

حذرنا الكبار واحنا لسه عيال من خطورة انننا نصبح (عيال صايعة) لما نتأخر في العودة للبيت بعد المدرسة بيستقبلوك
بسؤال متكرر (( كنت فين يا صايع لحد دلوأتى )) ولما يكون الزرار العلوى للقنيص مفتوح (( متفتحش صدرك زى
العيال الصايعة )) وكان في ارتباط وثيق بين التدخين والوقوف عالناصيه ومعاكسه البنات و..الصياعه .. الى آخره
ولقب صايع كان مخيف بيهرب منو كل الاولاد (( وهو الواحد ايه غير سمعه وشويه حجات فوق بعض )) وكنا بنبعد عن اى شخص بيحمل لقب صايع علشان الواحد (( مايتشبهش))
ولكن الطفرة الى حصلت انو كلمة صايع بدال ما بقت كلمة عيب وشتيمه وكخة
اصبحت وساما يضعه الآخرون علي صدر كل من يحوز اعجابهم ومبقاش الصايع هو
الشخص (( الى مش متربي قليل الادب الى بيسقط دايما وقاعد علي طول عالنت
وبيعلى صوتو علي أهله وبيسرق فلوس من ورا اهله علشان يجيب بيها سجاير ))
ولقب صايع مبقاش فقط علي الاشخاص .. انتقل لحجات تانيه كتير فمثلا (( خد عندك ))

- جهاز الموبايل الى فيه كل الامكانيات الى محتاجها والى بتحلم بيها .... يبقي موبايل صايع
- ممكن تلاقي جون (( صايع )) عبارة عن جملة بين 3 لاعبين سريعه ورشيقة وغير متوقعة
- ممكن تلاقي بوستر لألبوم لمطرب متصمم بطريقة صايعة ومحطوط في حتة صايعة
وممكن تشوف فيلم نهايته غير متوقعة فيبقي السيناريست الى كتب الفيلم
سيناريست صايع
- وممكن تلاقي بلد يتقال عليها (( بلد صايعة )) زى الصين الى قدرت انها تخترق مصر وبقالهها فكل بيت 20 منتج علي الاقل وبالتالى تقدر تقول ان (( الصين دول صايعين أوى:sm182: ))
دلوأتى نقدر نشجع بعض علي الصياعه بمفهومها الجديد

موضوع: رد: لفظ صايع الأحد أغسطس 17, 2008 5:20 pm

فعلا أوافقك الرأي يا حمود لفظ صايع بقي منتشر فيا حياتنا وفي عاميتنا المصرية

ودلوقتي بقي بمعني إنه متفوق في مجاله أو شاطر أنا هاخلي كلامي علي العامية علشان اللفظ

ده عامي مصري إحنا مستغربين من التحول إللي حصل في اللفظ ده

بس أنا شايف إن ما فيش حاجة غريبة في الحكاية دي لإن العامية المصرية مافيهاش قواعد

علي عكس الفصحي ولك جزيل الشكر Very Happy

موضوع: رد: لفظ صايع الأحد أغسطس 17, 2008 6:01 pm

شكرا لمرورك وردك الرائع يا محسن

موضوع: رد: لفظ صايع الإثنين أغسطس 18, 2008 2:32 am

موضوع جميل والله ياحمود وعلى راى الشاعر عم سيد بتاع الفراخ

(الصياعه ادب مش هز اكتاف )ههههههههههههه

وانا والله فعلا نفسى ابقى صايع بس بمفهومها الجديد cheers

موضوع: رد: لفظ صايع الإثنين أغسطس 18, 2008 9:49 am

موضوع جميل يا حوت
انت ولد صايع بجد
والصياعه ادب على رييى ميدو

موضوع: رد: لفظ صايع الإثنين أغسطس 18, 2008 2:56 pm

احلى رد صايع يا بوسطجى يا فتوه

موضوع: رد: لفظ صايع السبت فبراير 14, 2009 10:39 pm

ناااااااااااايس يا حوده